lunes, 28 de septiembre de 2009

Los sumerius venían de Raticulín...

Una busca nel Youtube de la parabra "sumerios" (lo mesmu si ponemus en ingrés "sumerians") mos da cuasi que namás pseudodocumentalis al tentu l'origin extraterrestri los Annunaki u al tentu l'Atlántida y practicaenti dingún vidiu que trati seriaenti d'esta fascinanti curtura ondi tuvu nacencia la cevilización. Está vistu que cuandu se trata de continíu murtimedia pol internet namás que vendi lo friki-magufu:

http://www.youtube.com/results?search_query=sumerios

http://www.youtube.com/results?search_query=sumerians


Más, el Youtube mos aconseja sabiaenti "Preba tamién: Nibiru" u "Preba tamién: Annunaki" pa atopalmus más risurtáus conas mesmas friki-magufás.


Fiuuuu fiuuuuuuuuu.

jueves, 26 de febrero de 2009

Lista 'e reproducción gamelanera

Pongu un atiju a la mi lista 'e reproducción del youtube qu'arrejunta lo de música gamelan que se pue atopal nel youtube, pal que le gusti. Tíni una tupa vidius (piezas javanesas, balinesas, sundanesas, esprimentalis, danzas...) y más que crecerá, pero varía muchu en caliá. Tendré qu'ordenalla u jad.el una selección:

http://www.youtube.com/view_play_list?p=8A3505306338DAFE

sábado, 14 de febrero de 2009

De Juhan Liiv

Aprovechandu que v'y a jad.el un articulinu de Juhan Liiv pa la Güiquipeya, v'y a endirgal esta ves traucionis de poeminas d'el almientáu a partil del original estoniu. Anguna cosa pue estal regulal polque yo d'estoniu sé mu poquinu, pero la custión es ponelsi.















La úrtima oportuniá

Apaña de lo helmosu lo úrtimu hermosu
de lo verdaeru la úrtima verdá
y de la belled.a lo úrtimu bellu.
De lo güenu lo úrtimu güenu possibri
de lo femeninu lo más sutil de lo sutil.
De lo dolorosu apaña el úrtimu dolol
y la úrtima esperiencia de sufrimientu.
Lo que tú arcendisti, enos brazus del su fuegu
t'arzará en gori a ti y a algotrus.

* * *

El sigurón y el bosqui

El sigurón:

¿De qué te silvi tanta jorasca?
En cualisquiel intri te pueu cortal.

El bosqui:

¡Antocis te queas sin maera pal cabu
y yo güervu a crecel!

* * *

Chinchirrinéu

Cuandu era un d.agal chiqueninu
un chinchirrinéu sonaba endrentu el mi pechu

Cuantis que me jui jid.iendu mayol
sonaba endrentu el pechu ca ve más de red.iu.

Ara abati m'ha intierráu essi ruíu
y jechu ciscu s'ha ajundíu p'abaju en él el mi pechu,

S'ha tolnáu ena mi vía y la mi alma
y en él se quearun estrechus los confinis del mundu.

--------

Mecánicaenti se muevi el pensaeru

Mecánicamenti se muevi el pensaeru,
mecánicaenti se muevi la pruma,
va perdiendu el ad.iu, tuviéndula enas manus,
mecánicamenti se barrunta la rima.

Antis bellu, ardienti, reditiéndussi,
alú 'spués nu pía movelsi.
agora la mi menti s'ha enfriáu
agora tamién el mi cantal ha espenáu.

No tiini que acabal juendu
Testigu del estiercu.
El mundu está delicámenti costruíu,
muchus maletus ena hestoria.

jueves, 7 de junio de 2007

Traduccionis. Del Fernando Pessoa.

Agora que andu con el aburrieru esti y nu me se acuerda naíta pa jad.el, v'y a esmenzal a jad.el traduccionis anque seya namás que pa enreal una mijina. Esmienzaré con algu cortinu y pulíu. Dos poeminas del Fernando Pessoa que siempri me han petáu muchu. En el primeru he passáu de ejallu con rima y midía cumu en el original, peru güenu. De siguru que la traducción tie angún yerru, peru velahí... Si anguién crei que pue jad.el anguna corrección, que me lo iga.

Estu.

Id.in que finju u mientu
tolo que escribu. No.
Yo namás que sientu
cona maginación,
nu utilid.u el corazón.

Tolo que me sueñu u vivu,
lo que me falla u acabija
es cumu qu'una terraza
polcima algotra cosina entovía.
Essa cosina sí que es pulía.

Pol essu escribu en metá
de lo que nu está de pie derechu,
libri del mi envaimientu,
seriu de lo que no es.
¿Sintil? ¡Que sientan quien lein!

-----------------------------------------

Yo enjamás nunca guardé piaras de ovejinas...

Yo enjamás nunca guardé piaras de ovejinas,
peru es cumu si las guardara.
La mi alma es cumu un pastol,
conoci el vientu y el sol
y va ajilandu de la manu de las estacionis
siguiendu y guipandu.

Tola pá la naturaled.a sin genti
víni a sentalsi en verina mía.
Peru yo me queu tristi cumu una postura de sol
pa la muestra maginación,
cuandu hay recenciu ena jondoná el llanu
y se sienti la nochi entrá
cumu una mariposa pola ventana.

Peru la mi tristed.a es atranquiju
polqu'es natural y justa
y es lo qu'ebi estal ena alma
cuandu ya piensa que dexisti
y las manus apañan froris sin pelcatalsi.

Comu un ruíu campanillus
más allá la curva el caminu
los mis pensamientus están contentus.

Namás que me da pena sabel qu'ellus están contentus,
polque si nu lo sabiessi,
pol ve d'estal contentus y tristis
estarían alegris y contentus.

Pensal es aginosu cumu dil ajilandu pola lluvia
cuandu el vientu creci y paji que lluevi más.

Nu tengu ambicionis ni deséus.
Sel poeta nu es una ambición mía,
es la mi manera de estal solinu.

Y si deséu a ved.is,
pol maginal, sel borreguinu
(u sel tola piara
pa andal esporriáu pol tola barrera 'el monti
juendu mucha cosina pahí felí a la mesma ve)
es namás polque sientu lo que escribu a la postura de sol,
u cuandu una nubi passa la manu polcima la lu
y corri un silenciu pola yelba.

Caicuandu me sientu a escrebil velsus
u, passeandu polos caminus u polas trochas,
escribu velsus en un papelinu que está en el mi pensamientu,
barruntu cumu una cayá enas manus
y veu una silueta de mi
ena cumbri de un cotorru
mirandu pa la mi piara y viendu las mis ideas,
u mirandu pa las mis ideas y viendu la mi piara,
y sonriyendu vagaenti cumu quien nu comprendi lo que se id.i
y quíi jad.el cumu que comprendi.

Salúu a tolos que me leyan
quitándulis el chaperu canchú
cuandu me ven a la mi puerta
cuantis que la diligencia ansoma ena cumbri del cotorru.
Los salúu y les deséu sol,
y lluvia, cuandu la lluvia jad.i farta,
que las sus casas tengan
ampié una ventana abría
una silla predilecta
andi se sientin, leyendu los mis velsus.
Y que en tuviendu los mis velsus piensin
que soy una cosa natural pahí-
Pol ejempru, un arbu antigu
a la sombra del cual cuandu chiquininus
se sentaban en diendu una tumba, cansáus de juegal,
y se limpiaban la suol de la frenti calienti
cona manga del babatel rayáu.

viernes, 1 de junio de 2007

(¿)Golví(?)

Qué te paj'a ti... Alú de tantu tiempu sin escrebil na en el bloguinu míu esti me da prejisamenti agora el arrepíu de retomallu otra ves. Y amás en esti idioma en que hain tan pocas cosinas escrebías pahí pola redi, anque la cosa va cambeandu a poquinu a pocu... Esti idioma que de acontinal las cosas comu jata el inti, acabijará estinguíu... Esti idioma tan llamáu de to tipu de nombris pahí pol tol mundu. Esti idioma tan pulíu, peru que sólu el utilid.allu ya le jad.rá a angunus crassificalmi cumu paletu retrógradu-aldeanista que se agina pol cosas que nu le van a dal de comel, un borreguinu que prantea probremas que nu esistin pa distrael y que los probremas realis nu aginin a naidi, un nacionalista malincónicu trasnocháu, presona afechá drentu las sus fronterinas que se crea él mesmu y cosinas paicías... Das ist aber lächerlich, jag kan tala på många språk, bahut bhaashaa bol saktaa hun... ¡Kaj mi parolas esperanton! Jata, comu es habitual, habrá una catarvá genti pahí que nu saba ni que esisti el idioma en que escribu ara mesmu... U que se crean que me lo he enventáu...

Craru, si es que tol mundu sabi que las encuestas del ALPI pa Pinufranqueáu, Mairoñera y el Payu estaban amañás, que los encuestaoris jid.un tos tranfulla, que tenemus una entrá en Ethnologue y ena PROEL polque aquel día dían una mijina alpistáus tos y habrían consideráu idioma jata el ruíu y el chilríu las sus lavaoras cuandu centrifugan... Que si anguna ves sentí a arguién mental cosinas comu "jad.el" o "jid.un" jue pol mé los efectus de jongus alucinóginus... Amos...

Ya me emporta tres que se bulrin, se riyan u que haiga poca genti que puea entendel estu. Amás de golvel a escrebil otra ves en el mí bloguinu, v'y a esmienzal a jad.ellu en ESTREMEÑU. Quid.ás no en el más prefectu, peru en estremeñu al fin y al cabu.

viernes, 27 de mayo de 2005

IN PRINCIPIO...

...ERAT PEDITVM. ET PEDITVM ERAT APVD DEVM, ET DEVS ERAT PEDITVM...